AR\DE é un proxecto que documenta a historia do deseño galego e promove a súa investigación.
O arquivo nace en 2023 como iniciativa de catro persoas socias da DAG Asociación Galega de Deseño. No Arquivo do Deseño Galego queremos servir de altofalante e de conector dos fondos e a documentación espallada en publicacións, arquivos, museos e coleccións.
O noso principal obxectivo é mellorar o coñecemento da historia do deseño galego incidindo en tres áreas:
Preservar o legado do deseño galego nun repositorio dixital, facilitando o acceso aos contidos e servindo de enlace entre pasado e futuro.
Promover proxectos que documenten o deseño galego para incorporar novas perspectivas e revelar novos datos da súa historia.
Servir de fonte de información, recollendo nun único sitio un grande número de referencias para facelas máis accesibles.
AR\DE nace, primeiramente, como unha lista de recursos que tratan o deseño galego. En xuño de 2024, incorpora un rexistro sonoro que aspira a preservar o pensamento de deseñadoras e deseñadores na súa propia voz. E finalmente, en decembro de 2025, presenta un arquivo dixital, con pezas e obras destacadas ao longo da historia.
O equipo de AR\DE, xunto cun grupo de especialistas en distintas disciplinas, propoñemos unha serie de deseños para incorporar á web. A maioría deles parten da busca en arquivos, museos, coleccións e recursos documentais. Tanto na proposta como na selección temos en conta varios criterios: o recoñecemento social; o seu impacto na sociedade, na economía ou na cultura; a súa relevancia histórica; a innovación formal, conceptual ou técnica; e a pervivencia no tempo.
Na selección de pezas e proxectos, definimos tamén uns obxectivos en relación á diversidade de xénero nas autorías. Buscamos mellorar a representatividade das mulleres, a miúdo ausentes no relato histórico por non seren recoñecidas nin nomeadas.
O Arquivo dixital inclúe proxectos deseñados en Galicia e fóra de Galicia, por creadoras e creadores de orixe galega ou non. O nexo común é o seu vínculo co noso territorio, ben porque foron proxectos desenvolvidos en Galicia ou para Galicia, ben porque as persoas que participaron no seu deseño teñen unha clara conexión con Galicia, a nosa historia, a nosa cultura e o noso patrimonio.
O Arquivo do Deseño Galego AR\DE é unha plataforma en constante crecemento. Celebramos as contribucións e suxestións das persoas que queiran compartir información con nós.