Cartel “Las dos simbolizan libertad”

Con só quince anos, o estudante de bacharelato Isaac Díaz Pardo participa activamente na campaña a favor do Estatuto de Autonomía de Galicia de 1936. A campaña de carteis estaba dirixida polo seu pai, Camilo Díaz Baliño, e a contribución de Díaz Pardo inclúe 5 pezas, das cales esta é a única que asinou. A iconografía da estrela Branca como símbolo de liberdade estaba tamén presente na obra do seu pai. O deseño baséase na simplificación e na síntese, dúas características fundamentais do cartelismo político de preguerra. O carácter directo, a ausencia de detalles superfluos e a combinación de imaxe alegórica con mensaxe contundente responden ao obxectivo de mobilizar emocionalmente ao espectador.