Páxina web Historia-Arte (HA!)

Co redeseño de HA!, Óscar Otero buscou transformar a web orixinal (un blog en Wordpress) nunha plataforma máis estruturada e con identidade propia, renomeándoa simplemente “HA!” e apostando por unha estética clara e audaz. A nivel tipográfico definíuse un novo sistema baseado en dúas familias, unha serif para textos longos e outra sans-serif xeométrica para títulos, navegación e interface, e establécese unha escala modular (inspirada na proporción áurea) para garantir coherencia e lexibilidade en distintos dispositivos. Na composición a protagonista é a ficha dunha obra de arte, xa que é o motivo principal polo que a web existe, se actualiza diariamente e acapara a inmensa maioría de visitas. Na ficha ordénanse os contidos distribuidos en bloques claros adaptados á proporción da imaxe (vertical, horizontal, cadrada). Para respectar o contido artístico, o obxectivo foi que a interface non competise coa obra, mantendo un deseño sobrio, usando cores extraídas das propias imaxes das pezas e espazos pensados para favorecer a lectura e a inmersión.