Traxes parella de campesiños composteláns Ballet Rey de Viana

Traxes de parella de campesiños composteláns, confeccionados e deseñados para o Ballet Rey de Viana. Sabemos, por unha fotografía de 1974, que estes traxes foron utilizados polo Ballet na súa actuación en Dublín. Era o vestiario da coreografía “Chovendo en Compostela” e estaba inspirado nos traxes tradicionais da área de Compostela no século XVIII. A peza fai referencia a unha danza cerimonial que se bailaba antigamente ao comezar a época de chuvia. Bailábase con zocas, que acompañaban a música co seu son seco e rítmico. Os bailaríns levaban tamén un paraugas. 

O Ballet Rey de Viana contaba con un equipo de xastras que confeccionaban todos os traxes da compañía. As primeiras referencias que atopamos cos seus nomes mencionan a Maruja Reimúndez, Gelines Martínez, Josefa Eiroa, Cristina Cordido e Magdalena Muinelo. Aínda que descoñecemos se estas xastras participaron no deseño das prendas que destacamos nesta ficha, mencionamos e incluímos os seus nome para destacar a súa labor dentro da compañía. A maioría de traxes do ballet estaban inspirados en traxes tradicionais, aínda que hai algunhas excepcións nas que o deseño de vestiario aparece asinado por Victoria Canedo e José Manuel Rey de Viana, fundadores da compañía.

O Ballet Galego Rey de Viana nace no ano 1949, creando un repertorio de coreografías propias con referencias a danzas populares, lendas e tradicións. As influencias históricas tamén se trasladaban á indumentaria e ao vestiario, que identificaban con distintas zonas de Galicia. A súa primeira actuación foi na cidade de A Coruña, en 1955. A compañía tivo unha longa traxectoria e contou co soporte das institucións públicas. No ano 2005 extínguese, pouco antes de que desaparecese tamén o Instituto Galego das Artes Escénicas e Musicais, do que dependía nese momento.