Cabeceiras “Andaina. Revista do movemento feminista galego” (primeira época)

Publicación trimestral ilustrada, editada en Santiago de Compostela e impulsada polas organizacións que deron lugar á Coordinadora Nacional de Organizacións Feministas. Nace co obxectivo de dar voz á produción de todas as mulleres e organizacións feministas que quixesen participar.

Créase en 1983 e constitúe un exemplo de deseño colaborativo. As cabeceiras e portadas foron, na súa maior parte, realizadas de xeito colectivo, agás o número 0, deseñado por Gloria Blanco Orviz, e os números 4, 5 e 6, realizados por Elena Cores. Os catro primeiros números están impresos en tinta violeta sobre papel branco e, a partir dos números 5 e 6 —en tinta negra sobre papel rosa— estandarízanse a tipografía e o formato da cabeceira.

Uqui Permui, integrante dos equipos de maquetación e de redacción na primeira etapa de Andaina, sinala que “Andaina foi unha forma orixinal de aterrar no deseño […]. Podo percibir como os cambios na revista coinciden cos cambios na miña aprendizaxe. Por exemplo, cando comezo a traballar no estudio de deseño do meu irmán; cando sae o número 11, incorporando por primeira vez fotografías; e no seguinte número coa primeira cabeceira realizada con Letraset, deixando atrás a letra debuxada».