Cartel “Fálalle galego”

Este cartel, deseñado a partir dunha fotografía de Manuel Janeiro, foi unha encarga da Xunta de Galicia para a primeira campaña de normalización lingüística. Tiña como obxectivo animar a pais e nais a comunicarse con fillas e fillos en galego e, ao mesmo tempo, combater os prexuízos que levaban á ruptura da transmisión da lingua. Esta campaña foi unha das primeiras actuacións que se fixeron dende as institucións públicas para a promoción do uso do galego, tras ser declarado lingua oficial no Estatuto de autonomía de 1980.