Logotipo Laboratorios Órzan

Laboratorios Orzán foi fundado na Coruña en 1922 por Diego Fernández. Co obxectivo de diferenciarse doutros laboratorios existentes na época, desenvolveuse unha estratexia baseada no investimento en maquinaria moderna e na difusión de publicidade nos medios de comunicación. O coidado no deseño publicitario e nas embalaxes contribuíu a situalo entre os laboratorios máis destacados.
Nos primeiros anos, a identidade gráfica non incluía logotipo. Posteriormente creouse un deseño acorde coa imaxe moderna que se pretendía proxectar. O logotipo presenta unha composición xeométrica formada por un círculo de trazo groso, que evoca a forma do “O” de “ORZÁN” e encerra un monograma tipográfico. No interior, as letras “R”, “Z”, “Á” e “N” configuran unha composición equilibrada. A tipografía, de deseño personalizado, caracterízase por trazos grosos e rectos, esquinas marcadas e cortes angulares. As letras comparten liñas estruturais, creando un selo de identidade compacto e sólido.