Símbolo xoiaría Malde

Identificador da xoiaría de Manuel Malde López, inaugurada en 1884 no número 69 da rúa Real da Coruña. O símbolo/monograma, de influenzas art déco, adoita aparecer integrado nunha composición circular xunto co escudo da Casa Real —en referencia á súa distinción como provedor oficial desde 1922— o nome da marca e a data de fundación. En varios deseños corporativos (almanaques, tarxetas e outros elementos da papelería e decoración) podemos ver a banda conformada por tres liñas con cruces oblicuas a modo de greca. 

As letras de MALDE organízanse no interior dun M envolvente, con caracteres lineais e estilizados que se entrelazan, sen remates. Aparece en publicidade impresa desde a segunda década do século XX, en adhesivos que colocaban nas pezas producidas no seu obradoiro, en estampados nas embalaxes ou en pezas máis recentes, como o envés das medallas conmemorativas do torneo de fútbol Teresa Herrera.

O éxito do negocio permite a apertura en 1933 doutro establecemento en Compostela, un proxecto do arquitecto José Caride considerado un dos escasos exemplos de arquitectura da primeira modernidade conservados en Galicia. Coñecido polo seu excelente traballo en prata de primeira lei, esta empresa familiar que perdurou tres xeracións, cerrou as súas portas en 2011, logo de máis de 112 anos de actividade.