X Cabalgada de Reises 1976, Muros

Cartel realizado polo artista e deseñador toledano Antonio Moragón, que residiu en Santiago entre 1959 e 1977. Un dos aspectos máis salientables do deseño é a reinterpretación dos Reis Magos como figuras próximas á realidade social galega, aparecen caracterizados como un labrego, un emigrante e un mariñeiro. Levan elementos que os vinculan directamente coa cultura popular e coa experiencia migratoria: boina, maleta, sombreiro, sacho e remo. Esta apropiación simbólica transforma o relato bíblico nunha alegoría contemporánea, na que os Reis encarnan a Galicia traballadora e desprazada, conectando a celebración tradicional cun discurso identitario e social propio do contexto da Transición.