Logotipo Sociedad Coral Polifónica de Pontevedra

Castelao deseñou este logotipo para a Sociedade Coral Polifónica de Pontevedra, unha agrupación que cofundou co propósito de contribuír, a través da música, á construción da cultura nacional galega. O motivo central representa un músico medieval, inspirado na figura do rei David da fachada das Praterías da catedral de Santiago de Compostela. A tipografía, de inspiración epigráfica e trazo manual, enlaza coas investigacións de Castelao sobre as inscricións medievais das igrexas galegas e do Pórtico da Gloria, que reinterpretou desde unha linguaxe vangardista. O resultado é un estilo coñecido como “letra galega”, convertida nun símbolo da identidade visual de Galicia e nunha das achegas máis duradeiras de Castelao ao deseño gráfico galego.