Portada revista “Nós”

A revista “Nós, Boletín mensual da cultura galega” foi a primeira revista escrita integramente en galego (desde os estudos científicos ata os anuncios publicitarios). Publicouse entre 1920 e 1936. Castelao, director artístico de Nós, buscou un deseño gráfico que contribuíse a crear unha estética xenuinamente galega, utilizando elementos da cultura popular. Por exemplo, a súa cabeceira utiliza a letra cunha intención clara de carácter identitario, inspirada nos textos inscritos en pedra do Pórtico da Gloria. Despois de varias versións da portada, Castelao chega á definitiva co número 32. A base gráfica deste deseño que imita un gravado, está nas portadas barrocas en forma de retablo e no uso do branco e do negro. Na composición deixase sentir o horror vacui da arte popular, motivos tirados de capiteis románicos e a iconografía do Santo Graal como símbolo da liberación e da identidade galega seguindo as ideas de Vicente Risco.