Vaixela Ferrádica

Ferrádica é unha vaixela composta por pezas cerámicas planas e de formato rectangular que se afastan do prato redondo tradicional. Foi deseñada no marco do proxecto GastroLab (2011), promovido por Sargadelos.

As pezas presentan contornos asimétricos e formas variables, condicionadas polo propio proceso de produción. A proposta traslada ao ámbito gastronómico o sistema tradicional de medida agraria galega dos ferrados, convertendo a parcelación do terreo en soporte culinario. A vaixela estrutúrase en tres soportes con superficies diferenciadas, equivalentes a distintas “parcelas”: unha superficie labrada, destinada a aperitivos secos, carpaccios ou elaboracións similares; unha superficie plana, axeitada para purés ou escumas; e unha superficie cóncava, pensada para caldos, sopas ou cremas. Cada peza cumpre unha función específica dentro do servizo. Dispostas lonxitudinalmente, xeran composicións topográficas que evocan unha paisaxe de inspiración galega.